ఉండవల్లి అరుణ్‌ కుమార్‌ వ్యాఖ్యలు అసందర్భంగా ఉన్నాయని, కావాలనే సీఎం జగన్‌పై ఆయన కామెంట్స్‌ చేశారని ఫైర్‌ అయ్యారు రామకృష్ణా రెడ్డి. విభజన జరిగిన తీరుపైనే కేసు వేశారని, హామీల అమలు కోసం కాదని.. విభజన హామీల అమలు కోసం ఏపీ ప్రభుత్వం పోరాడుతోందని సజ్జల స్పష్టం చేశారు. రెండు రాష్ట్రాలు కలిసే అవకాశాన్నీ ఏపీ సర్కార్‌ ఉపయోగించుకుంటుందని, ఇరు రాష్ట్రాలు కలిసుండాలని సుప్రీంకోర్టు ఆదేశిస్తే అంతకంటే కావాల్సిందేముందన్నారు. అప్పట్లో టీడీపీ, కాంగ్రెస్‌, బీజేపీ విభజనకు అనుకూలంగా వ్యవహరించాయని విమర్శించారు. రెండు రాష్ట్రాలు కలిసేదాని కోసం వైసీపీ పోరాడుతోందని మరోసారి సజ్జల రామకృష్ణారెడ్డి స్పష్టం చేశారు.
ఇదిలాఉండగా.. బుధవారం నాడు మీడియాతో మాట్లాడిన మాజీ ఎంపీ ఉండవల్లి అరుణ్‌ కుమార్‌.. ఏపీ సీఎం జగన్‌పై షాకింగ్‌ కామెంట్స్‌ చేశారు. విభజన గురించి వదిలేయండని ఆంధ్రప్రదేశ్‌ ప్రభుత్వం సుప్రీంకోర్టులో అఫిడవిట్‌ దాఖలు చేసిందంటూ ఆరోపించారు. ఎవరి ప్రయోజనాల కోసం ఈ అఫడవిట్‌ వేశారంటూ ఫైర్‌ అయ్యారు ఉండవల్లి. ఏపీకి జరుగుతున్న అన్యాయంపై మాట్లాడటానికి జగన్‌ ఎందుకు భయపడుతున్నారని ప్రశ్నించారు. పోరాటం చేసే జగన్‌ ముఖ్యమంత్రి అయ్యారని, ఇప్పుడు ఆ విషయాన్ని పూర్తిగా విస్మరిస్తున్నారని షాకింగ్‌ కామెంట్స్‌ చేశారు. ఏపీ కోసం పోరాటం చేయకపోతే జగన్‌ రాజకీయ జీవితం ఇంతటితో ముగిసినట్లేనని అన్నారు.