మంచు దుప్పటిలా పరుచుకునే శీతాకాలానికి ఎంతో ప్రత్యేకత ఉంది. ఈ కాలం ఎంతో ఆహ్లాదంగా ఉంటుంది. చలిగాలులు, మంచు తుంపరలు మనసుకు ఎంతో హాయిని, ప్రశాంతతను అందిస్తాయి. రాత్రిపూట దుప్పటి కప్పేసుకొని పడుకుంటే తెల్లారినా మెలకువే రాదు. ఈ సీజన్‌లో బద్ధకం కూడా కాస్త ఎక్కువగానే ఉంటుంది. సూర్యకాంతి తక్కువగా ఉంటుంది, పగలు సమయం కూడా తగ్గిపోతుంది. ఏ పనీ చేయాలనిపించదు, దేనిమీదా శ్రద్ధ ఉండదు. అన్నింటినీ వాయిదా వేయటం జరుగుతుంది. బద్ధకం పెరిగిపోతుంది, శక్తి స్థాయిలు తగ్గిపోతూ ఉంటాయి. సూర్యకాంతి తక్కువగా ఉండటం వల్ల.. విటమిన్‌ డి కూడా తక్కువగానే అందుతుంది. శరీరంలో విటమిన్‌ డి స్థాయిలు తగ్గిసేతే.. అలసట, నిస్సత్తువ, మానసిక స్థితి చికాకుగా ఉండటం వంటి సమస్యలు ఎదురవుతాయి. కొంతమంది వ్యక్తులైతే.. ఈ కాలంలో సీజనల్‌ ఎఫెక్టివ్‌ డిజార్డర్‌ అని పిలిచే డిప్రెషన్‌లోకి వెళ్తారు. దీని వల్ల శక్తిస్తాయిలు తగ్గుతాయి, పని చేయాలనే అసక్తి కూడా ఉండదు. చల్లటి వాతావరణం మనం, ఇంటికే పరిమితం అవ్వడానికి, ఇన్‌యాక్టివ్‌గా ఉండటానికి మొగ్గు చూపుతుంది, సోమరితనం అలవాటు చేస్తుంది.ఈ సీజన్‌లో మనం యాక్టివ్‌గా ఉడటానికి, బద్ధకాన్ని దూరం చేసుకోవడానికి ఆరోగ్యకరమైన ఆహారం ఎంతో తోడ్పడుతుంది. వీటిలోని విటమిన్స్‌, మినరల్స్‌, యాంటీఆక్సిడెంట్లు.. మీ శరీరానికి అవసరమైన శక్తిని అందిస్తాయి. ఈ సూపర్‌ ఫుడ్స్‌లో యాంటీఆక్సిడెంట్లు పుష్కలంగా ఉంటాయి. ఇవి ఆక్సిడేటివ్‌ స్ట్రెస్‌ను తగ్గిస్తాయి, శరీరంలో ఇన్ఫ్లమేషన్‌తో పోరాడటానికి సహాయపడతాయి. సరైన సెల్‌ పనితీరును నిర్ధరించడానికి తోడ్పడతాయి, అలసటను తగ్గిస్తాయి. ఈ సీజన్‌లో వెంటాడే.. బద్ధకాన్ని దూరం చేసుకోవడానికి కొన్ని సూపర్‌ ఫుడ్స్‌ సహాయపడతాయి. వాటిని ఇప్పుడు తెలుసుకుందాం.
బ్లూబెర్రీస్‌ : బ్లూబెర్రీస్‌లో యాంటీఆక్సిడెంట్లు, విటమిన్లు సమృద్ధిగా ఉంటాయి. ఇవి శరీరంలో రక్తప్రసరణను మెరుగుపరుస్తాయి, అభిజ్ఞా పనితీరును ప్రోత్సహిస్తాయి. బ్లూబెర్రీస్‌లోని పోషకాలు.. శరీర శక్తి స్థాయిలను పెంచుతాయి.
పాలకూర : పాలకూరలో ఐరన్‌ పుష్కలంగా ఉంటుంది. ఇది శరీరం అంతటా ఆక్సిజన్‌ను రవాణా చేయడానికి తోడ్పడుతుంది. ఐరన్‌ జీవక్రియను మెరుగుపరుస్తుంది, అలసటతో పోరాడుతుంది.
క్వినావో : శరీరానికి కావాల్సిన తొమ్మిది రకాల అమైనో ఆమ్లాలు క్వినోవాలో ఉంటాయి. వీటితో పాటు ప్రొటీన్‌ పుష్కలంగా లభించే ఈ ధాన్యంలో.. మెగ్నీషియం, కాపర్‌ వంటి మినరల్స్‌ సమృద్ధిగా ఉంటాయి. ఇవి ఎముక ఆరోగ్యానికి, జీవక్రియల పనితీరును మెరుగుపరచడంలో కీలక పాత్ర పోషిస్తాయి. పైగా ఇందులో గ్లూటెన్‌ ఉండదు కాబట్టి.. శారీరక సత్తువను పెంచుకొని బరువు అదుపులో ఉంచుకోవచ్చు.
చియా సీడ్స్‌ : ఈ సీజన్‌లో చియా సీడ్స్‌ మీ డైట్‌లో చేర్చుకుంటే.. బద్ధకం దూరం అవుతుంది. చియా విత్తనాల్లోని ఒమేగా - 3 ఫ్యాటీ యాసిడ్స్‌, ఫైబర్‌, ప్రొటీన్లు శరీర స్టామినాను పెంచుతాయి. ఇవి రక్తంలోని చక్కర స్థాయిలను పెంచుతాయి. అంతేకాదు, ఎనర్జీ క్రాష్‌లను నివారిస్తాయి. ఈ విత్తనాలను ఆహారంలో చేర్చుకుంటే ఎముకలు, దంతాలు దృఢంగా ఉంటాయి. వీటిలో ఒమేగా-3 ఫ్యాటీ యాసిడ్స్‌, మెగ్నీషియం సమృద్ధిగా ఉంటాయి. వీటిలో యాంటీ ఆక్సిడెంట్లు, క్యాల్షియం చాలా ఎక్కువ. ఈ విత్తనాలు హార్మోన్ల పనితీరును సమతౌల్యం చేసి రక్తపోటును నియంత్రిస్తాయి.
చిలకడదుంప : చిలగడదుంపల్లో కాంప్లెక్స్‌ కార్బోహైడ్రేట్‌ కంటెంట్‌తో పాటు ఫైబర్‌ అధికంగా ఉంటుంది. చిలగడదుంపలు శక్తిని స్థిరంగా విడుదల చేస్తుంది. మిమ్మల్ని సంతృప్తిగా ఉంచుతాయి. చిలగడ దుంపల్లో బీటా-కెరొటిన్‌, విటమిన్‌-ఈ, సి, బి-6, పొటాషియం, ఐరన్‌ పుష్కలంగా ఉంటాయి. వి యాంటీ ఇన్‌ఫ్లమేటరీ లక్షణాలను కలిగి ఉంటాయి. అంతర్గత అవయవాల వాపుని తగ్గిస్తాయి. ఈ దుంపల్లో మనకి అవసరమైన ఐరన్‌ అధికంగా ఉంటుంది. ఇది శరీర కణాల సామర్థ్యాన్ని పెంచి అన్ని భాగాలకు ఆక్సిజన్‌ సరఫరాని మెరుగుపరుస్తుంది. ముఖ్యంగా రోగ నిరోధక వ్యవస్థకు కీలకమైన తెల్లరక్తకణాల ఉత్పత్తికి సాయపడతాయి.
బాదం పప్పు : మాంగనీస్‌, మెగ్నీషియం, పీచు, ఆరోగ్యకరమైన కొవ్వు, విటమిన్లతో బాదంపప్పు మంచి పోషకాహారం. ఇందులో యాంటీఆక్సిడెంట్లు కూడా అధికంగా ఉన్నాయి. ఇది రోగనిరోధక శక్తిని పెంచుతుంది. బాదం మెదడును చురుగ్గా ఉంచుతుంది. ఈ సీజన్‌లో యాక్టివ్‌గా ఉండటానికి, అనారోగ్యాల బారి నుంచి తప్పించుకోవడానికి.. రోజూ ఐదారు బాదం గింజలు తినడం అలవాటు చేసుకోవాలని నిపుణులు సూచిస్తున్నారు.
గమనిక: నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.